ನನ್ನನ್ನೇ ಟಾರ್ಗೆಟ್ ಮಾಡಲಾಗುತ್ತಿದೆ: ದಿಲ್ ರಾಜು ಬಗ್ಗೆ ಯಾರು ಮಾತನಾಡಲ್ಲ, ಲೈಗರ್ ವಿತರಕ

ಭಾರೀ ನಿರೀಕ್ಷೆಯೊಂದಿಗೆ ತೆರೆಗೆ ಬಂದ ವಿಜಯ್ ದೇವರಕೊಂಡ ಹಾಗೂ ಪುರಿ ಜಗನ್ನಾಥ್ ಕಾಂಬಿನೇಷನ್ ನ ಲೈಗರ್ ಸಿನಿಮಾ ಬಾಕ್ಸ್ ಆಫೀಸ್ ನಲ್ಲಿ ಮಕಾಡೆ ಮಲಗಿದೆ. ಲೈಗರ್ ಸಿನಿಮಾ ಸೋತ ಬಳಿಕ ಚಿತ್ರದ ಬಗ್ಗೆ ಒಂದಲ್ಲ ಒಂದು ಸುದ್ದಿಗಳು ಕೇಳಿ ಬರುತ್ತಲೆ ಇದೆ. ಇದೀಗ ಚಿತ್ರದ ನಿರ್ಮಾಪ ವಾರಂಗಲ್ ಶ್ರೀನು ಹೊಸ ಬಾಂಬ್ ಸಿಡಿಸಿದ್ದಾರೆ. ಮ್ಯಾನ್ ವಿತ್ ಗೋಲ್ಡನ್ ಟಚ್ ಎಂದೇ ಖ್ಯಾತಿ ಘಳಿಸಿರುವ ವಾರಂಗಲ್ ಶ್ರೀನು ಪಡೆದುಕೊಂಡ ಸಿನಿಮಾಗಳೆಲ್ಲಾ ಬಾಕ್ಸ್ ಆಫೀಸ್ ನಲ್ಲಿ ಕೋಟಿ ಕೋಟಿ ಕಲೆಕ್ಷನ್ ಮಾಡಿವೆ. ಹುಷಾರ್, ಕಬಾಲಿ, ಇಸ್ಮಾರ್ಟ್ ಶಂಕರ್,ನಾಂದಿ, ಕ್ರ್ಯಾಕ್ ಸೇರಿದಂತೆ ಸಾಕಷ್ಟು ಸಿನಿಮಾಗಳನ್ನು ವಾರಂಗಲ್ ಶ್ರೀನು ವಿತರಣೆ ಮಾಡಿದ್ದಾರೆ. ಆದ್ರೆ ಲೈಗರ್ ಸಿನಿಮಾದಿಂದ ಮಾತ್ರ ಭಾರೀ ನಷ್ಟ ಅನುಭವಿಸುಂತಾಗಿದೆ. ಮೂಲಗಳ ಪ್ರಕಾರ ಶ್ರೀನು ಲೈಗರ್ ಸಿನಿಮಾದಿಂದ 100 ಕೋಟಿ ಕಳೆದುಕೊಂಡಿದ್ದಾರೆ ಎನ್ನಲಾಗುತ್ತಿದೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಶ್ರೀನು 100 ಕೋಟಿ ಲಾಸ್ ಆಗಿದೆ ಅನ್ನೋದು ಸುಳ್ಳು. ಆದರೆ ಲೈಗರ್ ಸಿನಿಮಾಗೆ ಹೂಡಿದ್ದ ಹಣದಲ್ಲಿ ಸುಮಾರು 65% ನಷ್ಟ ಆಗಿದೆ ಎಂದಿದ್ದಾರೆ. ಅಂದಹಾಗೆ ಟಾಲಿವುಡ್ ವಿತರಕರ ವಲಯದಲ್ಲಿ ವಾರಂಗಲ್ ಶ್ರೀನು ಹಾಗೂ ದಿಲ್ ರಾಜು ಹೆಸರು ದೊಡ್ಡ ಮಟ್ಟದಲ್ಲಿ ಚಾಲ್ತಿಯಲ್ಲಿದೆ. ಈ ಇಬ್ಬರ ನಡುವೆ ಸಾಕಷ್ಟು ಪೈಪೋಟಿ ನಡೆಯುತ್ತಿರುತ್ತದೆ. ಲೈಗರ್ ಸಿನಿಮಾದಿಂದ ವಾರಂಗಲ್ ಶ್ರೀನು ನಷ್ಟ ಅನುಭವಿಸಿದ್ದಾರೆ ಎಂದು ಮಾದ್ಯಮಗಳಲ್ಲಿ ವರದಿಯಾಗುತ್ತಿದಂತೆ, ‘ನನ್ನನ್ನು ಕಾರಣವಿಲ್ಲದೆ ಟಾರ್ಗೆಟ್ ಮಾಡಲಾಗುತ್ತಿದೆ. ಆದರೆ ಯಾರೊಬ್ಬರು ದಿಲ್ ರಾಜುಗೆ ಆದ ನಷ್ಟಗಳ ಬಗ್ಗೆ ಬರೆಯೋದೇ ಇಲ್ಲ’ ಎಂದಿದ್ದಾರೆ.