ಮತ್ತೆ ಹೀರೋ ಆಗಿ ಮಿಂಚಲು ರೆಡಿಯಾದ ಜೋಗಿ ಪ್ರೇಮ್

ಸ್ಯಾಂಡಲ್ ವುಡ್ ಸಿನಿಮಾ ರಂಗದಲ್ಲಿ ನಿರ್ದೇಶಕ ಜೋಗಿ ಪ್ರೇಮ್ ತಮ್ಮದೇ ಆದ ಹೆಸರು ಮಾಡಿದ್ದಾರೆ. ಸದ್ಯ ಪ್ರೇಮ್ ಧ್ರುವ ಸರ್ಜಾ ನಟನೆಯ ಸಿನಿಮಾದಲ್ಲಿ ತೊಡಗಿಕೊಂಡಿದ್ದು ಇದೇ 20ರಂದು ಚಿತ್ರದ ಟೈಟಲ್ ಲಾಂಚ್ ಮಾಡಲು ಭರ್ಜರಿ ತಯಾರಿ ಮಾಡಿಕೊಂಡಿದ್ದಾರೆ. ಈ ಮಧ್ಯೆ ಸಿನಿಮಾವೊಂದರಲ್ಲಿ ನಾಯಕನಾಗಿ ನಟಿಸಲು ಪ್ರೇಮ್ ಗ್ರೀನ್ ಸಿಗ್ನಲ್ ನೀಡಿದ್ದಾರೆ. 2015ರಲ್ಲಿ ತೆರೆಕಂಡ ಡಿಕೆ ಸಿನಿಮಾದ ಬಳಿಕ ನಾಯಕನಾಗಿ ಯಾವುದೇ ಸಿನಿಮಾಗೂ ಬಣ್ಣ ಹಚ್ಚಿರಲಿಲ್ಲ. ನಿರ್ದೇಶನದ ಕಡೆ ಸಂಪೂರ್ಣ ಗಮನ ಹರಿಸಿದ್ದ ಜೋಗಿ ಪ್ರೇಮ್ ಬರೋಬ್ಬರಿ 7 ವರ್ಷಗಳ ಬಳಿಕ ಮತ್ತೆ ಮುಖಕ್ಕೆ ಬಣ್ಣ ಹಚ್ಚಿ ಪ್ರೇಕ್ಷಕರನ್ನು ರಂಚಿಸಲು ರೆಡಿಯಾಗಿದ್ದಾರೆ. ಈ ಭಾರಿ ಪ್ರೇಮ್ ನಿರ್ದೇಶನದ ಸಿನಿಮಾಗೆ ಹೊಸ ನಿರ್ದೇಶಕ ಎಂ ಶಶಿಧರ್ ಆಕ್ಷನ್ ಕಟ್ ಹೇಳಿದ್ದು ಈ ಸಿನಿಮಾ ಸಖತ್ ಡಿಫರೆಂಟ್ ಆಗಿರಲಿದೆಯಂತೆ. ಶಶಧರ್ ಈಗಾಗಲೇ ಅರುಣ್‌ ರಾಮ್‌ಪ್ರಸಾದ್‌ ನಾಯಕರಾಗಿರುವ ‘ಘಾರ್ಗಾ’ ಸಿನಿಮಾವನ್ನು ನಿರ್ದೇಶನ ಮಾಡಿದ್ದು ಪ್ರೇಮ್ ಸಿನಿಮಾ ಇವರಿಗೆ ಎರಡನೇ ಸಿನಿಮಾವಾಗಿದೆ. ಮೂಲತಃ ಮೈಸೂರಿನವರಾದ ಶಶಿಧರ್ ಫಿಲ್ಮ್ ಮೇಕಿಂಗ್ ನಲ್ಲಿ ಉನ್ನತ ಶಿಕ್ಷಣ ಪಡೆದಿದ್ದಾರೆ. ಪ್ರೇಮ್ ನಿರ್ದೇಶನದ ಜೋಗಿ ಸಿನಿಮಾಗೆ ಬಂಡವಾಳ ಹೂಡಿದ್ದ ಎ2 ಫಿಲ್ಮ್ ಈ ಸಿನಿಮಾಗೂ ಬಂಡವಾಳ ಹೂಡಲಿದೆ. ಈ ಸಿನಿಮಾ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ನಿರ್ಮಾಣ ಆಗಲಿದ್ದು, ಇನ್ನಷ್ಟೇ ಶೀರ್ಷಿಕೆ ರಿವೀಲ್ ಆಗಬೇಕಿದೆ.