ಶ್ರೀದೇವಿ ಮಗಳು ಎಂದು ಹೇಳಿಕೊಂಡು ಸ್ಟಾರ್ ಡಮ್ ಪಡೆಯಬೇಕು ಎಂದುಕೊಂಡಿಲ್ಲ: ಜಾನ್ವಿ ಕಪೂರ್

ಬಾಲಿವುಡ್ ನ ಎವರ್ ಗ್ರೀನ್ ನಟಿ ಶ್ರೀದೇವಿ ಪುತ್ರಿ ಜಾನ್ವಿ ಕಪೂರ್ ಈಗ ತಾನೇ ಸಿನಿಮಾ ರಂಗದಲ್ಲಿ ಗುರುತಿಸಿಕೊಳ್ತಿದ್ದಾರೆ. 2018ರಲ್ಲಿ ತೆರೆಕಂಡ ಕರಣ್ ಜೋಹರ್ ನಿರ್ಮಾಣದ, ಶಶಾಂಕ್ ನಿರ್ದೇಶನದ ದಡಕ್ ಸಿನಿಮಾದ ಮೂಲಕ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ ಜಾನ್ವೀ ಒಂದೊಳ್ಳೆ ಹಿಟ್ ಸಿನಿಮಾಗಾಗಿ ಎದುರು ನೋಡ್ತಿದ್ದಾರೆ. ಚಿತ್ರರಂಗದಲ್ಲಿ ಕಷ್ಟಪಟ್ಟು ಮೇಲೆ ಬರುತ್ತಿರುವ ಜಾನ್ವಿ ನೆಪೋಟಿಸಂ ಟ್ರೋಲ್ ನಿಂದ ಬೇಸರಗೊಂಡಿದ್ದು ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದಾರೆ. ಈ ಬಗ್ಗೆ ಸಂದರ್ಶನವೊಂದರಲ್ಲಿ ಮಾತನಾಡಿದ ಜಾನ್ವಿ ಕಪೂರ್, ನನ್ನ ಬಗ್ಗೆ ಸಾಕಷ್ಟು ಜನರಿಗೆ ದುರಭಿಮಾನ ಇದೆ. ನಾನು ಶ್ರೀದೇವಿ ಮಗಳು ಎಂದು ಹೇಳಿಕೊಂಡು ಬಂದು ಸ್ಟಾರ್‌ಡಮ್ ಪಡೆಯಬೇಕು ಎಂದುಕೊಂಡಿಲ್ಲ. ನಾನು ಸುರ ಸುಂದರಿಯೂ ಅಲ್ಲ, ನನಗೆ ಅದ್ಭುತ ಪ್ರತಿಭೆ ಕೂಡ ಇಲ್ಲ. ಆದರೆ ನಾನು ಶೂಟಿಂಗ್‌ ಸೆಟ್‌ನಲ್ಲಿ ಬಹಳ ಕಷ್ಟಪಡುತ್ತೇನೆ. ಅದೇ ಶ್ರಮದ ತತ್ವ ನಾನು ಚಿತ್ರರಂಗದಲ್ಲಿ ಬೆಳೆಯಲು ಸಹಾಯ ಮಾಡುತ್ತದೆ ಎಂದು ನಂಬಿದ್ದೇನೆ ಎಂದು ಜಾನ್ವಿ ಹೇಳಿಕೊಂಡಿದ್ದಾರೆ. ಸಿನಿಮಾ ಸೆಟ್ ನಲ್ಲಿ ನಾನು ಎಷ್ಟು ಕಷ್ಟ ಪಡುತ್ತೇನೆ ಎಂಬುದು ನನಗೆ ಗೊತ್ತಿದೆ. ಅದನ್ನು ರಕ್ತದಲ್ಲಿ ಬೇಕಾದರು ಬರೆದುಕೊಡುತ್ತೇನೆ. ನನ್ನ ಕೆಲಸದ ಬಗ್ಗೆ ಯಾರಿಗೂ ಅನುಮಾನವೇ ಬೇಡ ಎಂದಿದ್ದಾರೆ. ಅಲ್ಲದೆ ನನ್ನ ತಾಯಿ ಶ್ರೀದೇವಿ ಸಿನಿಮಾಗಳಲ್ಲಿ ಬ್ಯುಸಿ ಇದ್ದಾಗ, ಯಶಸ್ಸಿನ ತುತ್ತ ತುದಿಯಲ್ಲಿ ಇದ್ದಾಗ ನಾನಿನ್ನು ಹುಟ್ಟಿರಲಿಲ್ಲ. ಆಕೆ ಸಿನಿಮಾದಲ್ಲಿ ನಟಿಸುವುದನ್ನು ನಿಲ್ಲಿಸಿದ ಮೇಲೆ ನಾನು ಹುಟ್ಟಿದೆ ಎಂದು ಜಾನ್ವಿ ಹೇಳಿದ್ದಾರೆ. ನಾನು ನನ್ನ ತಾಯಿಯ ಯಶಸ್ಸನ್ನು ನೋಡದೆ ಇರಬಹುದು. ಆದರೆ ಆಕೆ ಸೆಟ್ ನಲ್ಲಿ ಯಾವ ರೀತಿ ಇರುತ್ತಿದ್ದಳು, ಆಕೆಯ ಯಶಸ್ಸು ಹೇಗಿತ್ತು ಎಂಬುದನ್ನು ಬೇರೆಯವರು ಮಾತನಾಡುವಾಗ ತಿಳಿದುಕೊಂಡಿದ್ದೇನೆ ಎಂದಿದ್ದಾರೆ. ಸದ್ಯ ಜಾನ್ವಿ ಕಪೂರ್ ನಟನೆಯ ಮಿಲಿ ಟೀಸರ್ ರಿಲೀಸ್ ಆಗಿದ್ದು ನವೆಂಬರ್ 4ರಂದು ಸಿನಿಮಾ ತೆರೆಗೆ ಬರಲಿದೆ.